back

Hrekkjavaka Árbæjarsafns 31. okt

25.10.2021 X

Hrekkjavaka verður haldin á Árbæjarsafni sunnudaginn 31. október frá kl. 18:00-20:00. Safnið verður sveipað dulúðlegum blæ, húsin verða hryllileg og í rökkrinu má sjá bregða fyrir svipum fortíðar.

Hrekkjavaka Árbæjarsafns
Hrekkjavaka Árbæjarsafns

Markmiðið er að gestir kynnist fornum siðum hátíðarinnar og hver veit nema andar fortíðarinnar verði á vegi þeirra. Þau allra hugrökkustu geta bankað upp á draugaleg hús sem hafa logandi lukt og krafið framliðna íbúa þeirra um grikk eða gott.

Aðgangur er ókeypis fyrir börn að 17 ára aldri, öryrkja og menningarkortshafa, aðrir gestir greiða 1.800 kr.

Börn 12 ára og yngri verða koma í fylgd með fullorðnum. Viðkvæmar sálir eru einnig hvattar til að hafa með sér fylgdarmann til halds og trausts.

P.s. Við mælum með að þið komið gangandi eða með strætó þar sem bílastæði við safnið eru frekar fá.

Hrekkjavökudagskrá Árbæjarsafns
Hvað Hvenær Hvar
Inngangur að draugafræðum I (fyrir yngri börn) 18:15 Landakot
Inngangur að draugafræðum I (fyrir eldri börn) 19:00 Landakot
Grímusmiðja 18-20 Kornhús
Elddrottning sýnir listir sínar 19:30 Fótboltavöllur
Seiðskratti á vappi 18-20 Safnsvæði og Garðastræti
Eldsmiður að störfum 18-20 Eldsmiðjan
Nammihús 18-20 Kleppur, Kjöthús, Miðhús, Skrúðshús og Þingholtsstræti
Ratleikur 18-20 Afhentur í Lækjargötu
Myndahorn 18-20 Líkn

 

Hrekkjavaka hefur gengið í gegnum endurnýjun lífdaga víða um Evrópu og hafa mörg söfn tekið upp þann sið að halda upp á hrekkjavöku með frábærum árangri. Samkvæmt gamalli norrænni hefð og keltneskri þjóðtrú markar hrekkjavaka upphaf nýs árs en þá er sumarið kvatt með von um góða endurkomu og þakkir veittar fyrir góða uppskeru.

Allraheilagamessa 1. nóvember var ein af helgustu hátíðum kaþólsku kirkjunnar á Íslandi. Samkvæmt Grágás var bændum þá skylt að gefa fátækum mat sem var skipt á milli þeirra á hreppssamkomu. Á ensku heitir kvöldið fyrir Allraheilagramessu All Hallows’ Eve (allra heilagra kvöld) sem hefur síðar breyst í Halloween og er alþekkt gleðskapar- og vættarhátíð á Bretlandseyjum og víðar þar sem menningaráhrifa þaðan gætir.

Samhain er keltnesk hátíð hinna dauðu sem haldin var hátíðleg frá 31. október – 1. nóvember og markaði hún endann á uppskerutímabilinu og upphaf vetrar og hins myrka hluta ársins. Þá kveikti fólk bál og klæddi sig í búninga til að vernda sig og dyljast heiðnum guðum og öndum. Fólk gekk á milli húsa í búningum og kvað vísur í skiptum fyrir mat og hefð var fyrir því að kveikja á kertum og koma þeim fyrir í útskornum næpum eða kartöflum. Nú er þessi hátíð þekkt sem Halloween eða hrekkjavaka upp á íslensku.